അനുഭവങ്ങള്‍ പാളിച്ചകള്‍

അനുഭവങ്ങളില്‍ പലതും പാളിച്ചകള്‍ ആണെങ്കിലും ഈ പറയാന്‍ പോകുന്നത് അല്പം വേദന നിറഞ്ഞതാണ്‌ ...
7th സെമസ്റ്ററില്‍ പഠിക്കുന്ന കാലം , പഠനയാത്ര എന്ന പേരില്‍ ഒരു വിനോദയാത്രക്ക് ക്ലാസ്സിലെ എല്ലാവരും കൂടി പോയി . സിനിമ ഷൂട്ടിങ് നു പ്രസിദ്ധമായ ആതിരപ്പള്ളി - വാഴച്ചാല്‍ ആണ് ആദ്യം സന്ദര്‍ശിച്ചത് . അവിടെ വെച്ച് സാഹസിക സഹോദരിമാര്‍ എന്ന പേരില്‍ അറിയപ്പെടുന്ന രണ്ട് സുഹൃത്തുക്കള്‍ മറിഞ്ഞടിച്ചു വീണു എങ്കിലും പരിക്കൊന്നും കൂടാതെ രക്ഷപെട്ടു.( അവര്‍ അതൊക്കെ ഓര്‍ക്കുന്നുണ്ടോ എന്തോ .. )

അവിടെ നിന്നും ചെറായി ബീച്ചിലേക്ക് ആണ് പോയത് . വെള്ളത്തില്‍ ഇറങ്ങണ്ട എന്ന് കരുതി ഞാന്‍ കരയില്‍ തന്നെ നിലയുറപ്പിച്ചു . പക്ഷെ ചില 'സ്നേഹസമ്പന്നരായ' സുഹൃത്തുക്കള്‍ ഈ ഉള്ളവനെ വലിച്ചു വെള്ളത്തിലിട്ടു. ചെറായി കടപ്പുറത്തെ മണല്‍ തരികള്‍ക്ക് മൂര്‍ച്ച കൂടും ,തൊലി പുറത്തു പോറലുകള്‍ ഉണ്ടാക്കും .മണല്‍ തരികള്‍ വസ്ത്രങ്ങല്‍ക്കുള്ളിലെല്ലാം കേറിക്കൂടി ആകെ ഒരു വിമ്മിട്ടം സൃഷ്ടിച്ചു . ഒരു വലിയ തിര വന്നു കാല്‍ക്കീഴിലെ മണല്‍ ഒഴുക്കി കളഞ്ഞു ബാലന്‍സ് നഷ്ടപ്പെട്ടു ഞാന്‍ ഒന്ന് വീണു . എന്‍റെ പുറത്തേക്കു വേറെ ഒരു സഖാവും മറിഞ്ഞു വീണു . കുറച്ചു നേരം പ്രാണഭയം എന്നെ പൊതിഞ്ഞു തലയ്ക്കു മുകളില്‍ വെള്ളവും കൂടെ എന്തോ ഒരു ഭാരവും എന്താണ് സംഭവിച്ചതെന്ന് മനസ്സിലാക്കാന്‍ അല്പം സമയമെടുത്തു. ആരോ കൈ പിടിച്ചു എണീപ്പിച്ചു , ഇനിയും അനിഷ്ട സംഭവങ്ങള്‍ ഉണ്ടാവാന്‍ സാധ്യത ഉള്ളതിനാല്‍ പയ്യെ കരയിലേക്ക് മാറി ഇരുന്നു .

തിരിച്ചു പോവുമ്പോള്‍ ചെറുതായി നടുവേദന ഉണ്ടായിരുന്നു എങ്കിലും കാര്യമാക്കിയില്ല , ഉറങ്ങി എഴുനെല്‍ക്കുംപോലെക്കും എല്ലാം ശരിയാവും എന്നായിരുന്നു പ്രതീക്ഷ . രാവിലെ കിടക്കെന്നു എണീക്കാന്‍ നോക്കുമ്പൊ പറ്റണില്ല ഒടുക്കത്തെ വേദന .. സഹമുറിയനോട് സഹായിക്കാന്‍ പറഞ്ഞു . അഞ്ചടി പൊക്കവും മുപ്പത്തി അഞ്ചു കിലോ തൂക്കത്തില്‍ ഒരു ആജാനു ബാഹു ആരുന്നു എന്‍റെ സഹമുറിയന്‍ . പാതി വലിച്ചു പൊക്കി കഴിഞ്ഞപ്പോള്‍ അദ്ദേഹം പറഞ്ഞു " ഡേയ് എനിക്ക് നിന്നെ പൊക്കാനൊന്നുമ് വയ്യ" പറഞ്ഞു തീരുന്നതിനു മുന്‍പ് ആ പഹയന്‍ കൈ വിട്ടു. വെട്ടിയിട്ട വാഴ പോലെ ഈ ഉള്ളവന്‍ കട്ടിലിലേക്ക് മറിഞ്ഞു വീണു .. അതോടെ പാതി എണീക്കാന്‍ ഉണ്ടാരുന്നു ജീവനും പോയി . അങ്ങനെ മരത്തടി പോലെ വൈകുന്നേരം വരെ കിടന്നു . വൈകുന്നേരം ഒരു സുഹൃത്ത്‌ കാറുമായി വന്നു . രണ്ടു പേരുടെ സഹായത്തോടെ കാറില്‍ കയറി ആശുപത്രിയിലേക്ക് .

ആശുപത്രിയിലെത്തി ചീട്ടെടുത്ത്‌ വിദഗ്ധ വൈദ്യനെ കണ്ടു . വിദഗ്ധ വൈദ്യന്റെ മുറിയില്‍ , വൈദ്യത്തിനു പഠിക്കുന്ന രണ്ടു വിദ്യാര്‍ഥികള്‍ ഉണ്ടാരുന്നു . അവരുടെ സംസയങ്ങള്‍ തീര്‍ത്തു കൊടുക്കുന്നതിന്റെ ഇടയിലാണ് ഞാന്‍ ചെന്ന് കയറിയത് . ഡോക്ടര്‍ എന്നോട് എങ്ങനെയാണു ഇത് "സംജാതമായത്" എന്ന് തിരക്കി .. ഞാന്‍ ചുരുക്കി കാര്യങ്ങളൊക്കെ പറഞ്ഞു.
ഡോക്ടര്‍ (ഗൌരവത്തില്‍ ) : MRI സകാന്നിംഗ് ചെയ്യണം , എന്താണ് ഈ MRI എന്ന് അറിയാമോ ?
ഞാന്‍ : ഹ്മ്മം ഞാന്‍ പഠിച്ചിട്ടുണ്ട് .. biomedical ക്ലാസ്സിനെ മനസ്സില്‍ ധ്യാനിച്ച് കൊണ്ട് ഒരു കാച്ചു കാച്ചി ..
(പുള്ളിക്കത്ര ഇഷ്ടപ്പെട്ടില്ല എന്ന് തോന്നുന്നു )
ഡോക്ടര്‍ : താന്‍ പോയി ആ ഡെസ്കില്‍ കയറി കിടക്കു .
(ഒരു ഇരയെ കിട്ടിയ ഭാവം ആരുന്നു അപ്പോള്‍ ആ മുഖത്ത് )
ഡോക്ടര്‍ വന്നു എന്‍റെ കാല്‍ പിടിച്ചു മടക്കി
ഡോക്ടര്‍ : വേദനയുണ്ടോ ??
ഞാന്‍ : ഏയ് ഇല്ല .
പിന്നീട് മുട്ടില്‍ കൈ അമര്‍ത്തികൊണ്ട് കാല്‍ പയ്യെ ഉയര്‍ത്തി
ഡോക്ടര്‍ : ഇപ്പോള്‍ വേദന ഉണ്ടോ ?
(യെവനെ അങ്ങനെ വിട്ടാല്‍ പറ്റില്ല എന്ന ഒരു ഭാവം മുഖത്ത് )
ഞാന്‍ : അല്പം ( ഒരു വിധം നന്നായി നോവുന്നുന്ടെന്കിലും മുഖത്ത് കാണിച്ചില്ല , വൈദ്യ വിദ്യാര്‍ത്ഥികളില്‍ ഒന്നു ഒരു പെണ്‍കുട്ടി ആരുന്നു , അത് കൊണ്ട് ധൈര്യം അഭിനയിച്ചു )
എന്‍റെ കാല്‍ അല്പം കൂടി ഡോക്ടര്‍ ഉയര്‍ത്തി , എനിക്ക് നന്നായി വേദനിച്ചു തുടങ്ങി .
ഡോക്ടര്‍ (വൈദ്യ വിദ്യാര്‍ത്ഥികളോട്) : see, see his expression , he is feeling pain .
ഡോക്ടര്‍ (എന്നോട്) : ഇപ്പൊ വേദനിക്കുന്നുണ്ടോ ?
ഞാന്‍ (ദയനീയ ഭാവം മുഖത്ത് ) : ഹ്മ്മം ... ഒണ്ടു .
ഡോക്ടര്‍ (അല്പം കൂടി കാല്‍ ഉയര്‍ത്തികൊണ്ടു ,വൈദ്യ വിദ്യാര്‍ത്ഥികളോട് ) : കാലു ഇപ്പൊ ഏകദേശം എത്ര ഡിഗ്രി പോങ്ങിയിട്ടുണ്ട് ?
( എന്‍റെ ദൈന്യ ഭാവം കൂടുതല്‍ ദൈന്യമായി )
ഒരു വൈദ്യ വിദ്യാര്‍ഥി : I think it comes around 20 degrees
മറ്റേ വിദ്യാര്‍ഥി : എനിക്ക് തോന്നുന്നത് 30 ഡിഗ്രീസ് കാനുമെന്നാ .
ഡോക്ടര്‍ : 20 ഡിഗ്രീസ് കാണും , and this test is know as straight leg elevation test .
(എന്‍റെ ദയനീയ ഭാവത്തില്‍ അല്പം ദേഷ്യം കലര്‍ത്തി, ക്ഷമക്കു ഒരു പരിധിയില്ലേ )
ഡോക്ടര്‍ കാലു വിട്ടു .. ഞാന്‍ relaxed ആയി .
ഡോക്ടര്‍ (എന്നോട്) : അപ്പൊ സ്കാനിംഗ്‌ ചെയ്യുവല്ലേ ?
ഞാന്‍ : ഇല്ല .. കാശില്ല .
ഡോക്ടര്‍: student ആയതു കൊണ്ട് ബില്‍ കുറച്ചു ഇളവ് തരാം .
(കുറച്ചു സമയം പരീക്ഷണ വസ്തു ആക്കീത് കൊണ്ടാരിക്കണം ഈ ഓഫര്‍)
ഞാന്‍ : ഇല്ല ഞാന്‍ വീട്ടില്‍ പോയിട്ട് പൈസ കൊണ്ട് വന്നിട്ട് ആലോചിക്കാം .
ഡോക്ടര്‍ : ശരി തല്‍കാലം ഞാന്‍ ഒരു ഇന്ഞെക്ഷന് കുറിച്ച് തരാം പിന്നെ മരുന്നും ഉണ്ട് .
അങ്ങനെ ഇന്ഞെച്ഷനുള്ള മരുന്നും വാങ്ങി കുത്തിവെക്കുന്ന റൂമില്‍ എത്തി. നടുവിനാണ് കുത്തെണ്ടത് , കമിഴ്ന്നു കിടക്കാന്‍ പറഞ്ഞു . ഞാന്‍ കിടന്നു . പുറകില്‍ ഒരു സംസാരം
ശബ്‌ദം 1: സൂക്ഷിച്ചു എടുത്താല്‍ മതി , പ്രശ്നമൊന്നും ഇല്ല . പിന്നെ പറഞ്ഞതൊക്കെ ഓര്‍മയില്ലേ ?
ശബ്‌ദം 2 : ശരി മാം . . .
( എന്റമ്മേ വീണ്ടും പരീക്ഷണ വസ്തു ആവനാണോ വിധി .. .. ) ഞാന്‍ തിരിഞ്ഞു നോക്കി .. ഒരു കൊച്ചു പെണ്ണ് സൂചീം പിടിച്ചു കുത്താന്‍ നിക്കുന്നു .
ഞാന്‍ : കുത്തിവെക്കാന്‍ ഒക്കെ അറിയാമോ ?
കൊച്ചു നര്‍സ് : ഹ്മ്മം പഠിച്ചിട്ടുണ്ട് ..
ഞാന്‍ (മനസ്സില്‍ ) : എന്‍റെ ഭഗവാനെ .
സൂചി കുത്തി കഴിഞ്ഞ ശേഷം കൊച്ചു നര്‍സ് : കുത്തിവെക്കാന്‍ പോകുവാണെ
ഞാന്‍ (വേദനയോടെ) : അതിനു കുത്തി വെച്ച് കഴിഞ്ഞില്ലേ ??
കൊച്ചു നര്‍സ് (നിഷ്കളന്കതയോടെ) : ഹ്മ്മം .. കഴിഞ്ഞു ഇന്‍ജെക്ഷന്‍ എടുക്കനതിനു മുന്നേ പറയണമെന്ന് മാഡം പറഞ്ഞിരുന്നു , ഞാന്‍ മറന്നു പോയതാ ...
അങ്ങനെ വീണ്ടും വീണ്ടും പരീക്ഷണ വസ്തു ആയിക്കൊണ്ടിരുന്നു ഈ രചയിതാവ്.
എങ്ങനെ എങ്കിലും ഈ പരീക്ഷണ ശാലയില്‍ നിന്നും രക്ഷപ്പെടണം എന്ന ഒരു ചിന്ത മാത്രം ആയി മനസ്സില്‍.
ഒരു മൂന്നു ആഴ്ച കാലം നടു പ്രതിഷേധത്തില്‍ ആരുന്നു . നേരെ നടക്കാന്‍ പറ്റില്ല . ഒരു 10 ഡിഗ്രി ചരിവ് .
"നീ മോഹന്‍ലാലിനു പഠിക്കുവാണോ??" എന്ന ചോദ്യ ശരങ്ങള്‍ ..
പിന്നെ ദൈവകൃപയാല്‍ എല്ലാം ശരിയായി .

Posted in: അനുഭവങ്ങള്‍ പാളിച്ചകള്‍